Am 07.06.2020 is in dem Somma z'Penzberg a grausige Sauerei passiert in oam vo dene Glosscheamviatl. Mittn in da Fria bei da Nocht so ummara 11:30 san a boor so Santla in an Vorgartn am ESV-Blotz eineglatscht.
Da Vorschdand vom Weilheima Drachtnverein hod gmoant, das dees blos a boor Sechzga gwen sein kanntn, 
weils a soa Fandl gfundn hom. Wos genau dasa moant, woitaneedsong , der Hamme. Er hod aba gmoant, das dees need grod de Blitzgneissa gwen sei kanntn, weis des 60-er Schuitl obegschraubt und in Gartn hiegschmissn ham. Wahrscheinle war eane dees z'schneu.
Jo und nachad ham de Dreeghammen eanan ganz Speamüll in Vorgartn einegrotzt und a Bayernflagge aufghängt. Dann hamms aa no so a Augustinafassl hiegstoit und wea woas wos do drin war. Wahrscheinle a Warsteiner.
Nachad hamms hoid de Schbrendschdoff-Fuzzis liaba ind Luft gjogd, need das do no oana aussesauft und si weawoaswoshoid. D'Nachbarn woitn ja aa wos seng, aba de hamms dann schnoi weidagschdaubt. Do gibtz nix zum Seng!!! Sogor de Tutzinger Bummlbahn hams lanxama fahrn lossn und am HoizmannBäda sein Stadtbus aufghoitn. Am ESV Blotz war äh grod koana.
Irgndwia ham dann aa no die Burschn vom Sindlsdorfa Schütznvarein Wind griagt und san mit eanane Schbezln vo Obersifflhofn und Untasecharing zum Schaung kema. Weis baim Löschn hoifn woitn, hams xogt. Jo, und de vo da Beagwacht und vom Rodn Greitz warn aa do mit eanane Loatawagl, wei eana irgndoana gsteckt hod, dass do a Freibier gibt.
Wias dees Fassl dann gsprengt ham, is sche lanxam dann a der Audi 80 vo da Penzberga Bolizei dazuagstessn und hod de Garaschneinfahrt obgsichert. Und a ADAC Hubschrauba is aa grod zufällig drübergflong.
Jetzat hams hoid de Sauerei do, wei bei dera Exblosion need vui übrig blim is vom Haus und vo dem vo de Nachbarn. Wer braucht a boor obbräslte Ziaglstoana?
De Hanswurschtn ham se natürle vorher blädaweise rechtzeitig ausm Staub gmacht, hamm aba need gspannt, dass's vo dera Übawachungskamera gfuimt worn san. De Buidl sann zwar nix Gscheids worn, aba a bor Dreie davo hams no auseziang kenna.
De Schandis vo Weilheim hoffm hoid jetz blos, das irgndwer irgndwos xeng hod..
- Wer kennt de Haumdaucha?
- Wea hod wos xeng, ghert oda grocha?
- Wer kennt wen, der wo den Dreeg umarasunst wegrammt?
Wennst wos woas, sogsdas de Schandis, de Telekomiker oda Du schreibtas auf Feisbuck.